Нашақорлық - қауіпті індет, алдын - алу міндет.

Қазіргі таңда Маңғыстау облысында 3101 маскүнем мен нашақор есепте тұр. Оның 850 - ін есірткіге тәуелді нашақорлар құрап отыр. Ең жоғарғы көрсеткіш, Ақтау қаласында есірткіге және нашақорлыққа тәуелді 522 адам тіркелген. Жаңаөзенде - 161 адам, Мұнайлыда - 134 адам диспансерлік есепте тұр, ең төмен көрсеткіш Маңғыстау ауданына тиесілі, мұнда есірткіге тәуелді - 1 адам есепке алынған.

- Нашақорлық-әлеуметке ортақ проблема. Жер бетіне миллиондаған өмірлерді алып кетіп жатқан бұл ауру әлемдік трагедия десек те болады. Жыл санап есірткінің де түрлері көбейіп отыр. Бұрынғы кездері қолданатын героин, марихуананың қазіргі таңда синтетикалық, дозасы көбейген түрлері шығып жатыр. Жалпы облыста анашаны қолданатын жастар саны артып отыр. Олардың басым көпшілігі 20 мен 39 жастағы ер азаматтар. 18 дейінгі сегіз жасөспірім профилактикалық есепте тіркелген, яғни олар есірткіге тәуелді емес, аракідік қолданғандар. Араларында толыққанды отбасында тәрбиеленбеген жасөспірімдер саны көп. Сондықтан да жыл басталғалы есірткіге қарсы күресу мақсатында облыс көлемінде көптеген шаралар жүргізіледі. Мектептерде, жоғары оқу орындарында әр түрлі бағытта кездесулер өтті. Есепте тұрған ата - аналармен кездесіп, түсіндіру жұмыстарын жүргіздік. Мұндай жұмыстар алдағы уақытта да жалғасын табатын болады, - деген облыстық наркологиялық диспансерінің нарколог - дәрігері Қорлан Елеуова есірткіні пайдаланудың соңы қатерлі ісікке, құрт ауруына, психикалық ауруға әкеліп соғатынын айтты. Жастардың насыбайды, темекіні, ішімдікті, қор - қорды ( кальян ) пайдалануының соңы көбіне есірткіге деген қызығушылығын тудыратынына тоқталды.

- Бүгінгі таңда біздің профилактикалық есебімізде анаша қолданатындар саны көп тіркеліп отыр. Себебі соңғы кездері жүргізуші куәлігі берілетін кезде, қару - жарақпен жұмыс жасайтын мекемелерге қызметкер алатын болса, жұмыс беруші мекемелерден бізге келіп, наркотест тапсыруға талап қойылады. Сондықтан да біз тұрғындармен тығыз жұмыс жасап, тексеруге мүмкіншілік алдық. Мүмкін соның да себебінен болар, облысымызда өткен жылдармен салыстырғанда профилактикалық тіркеуге алынғандардың саны көбейіп отыр. Қоғамда өз еркімен келіп, емделіп, есірткіні мүлдем тастағысы келетін адамдар да кездеседі, бірақ олардың саны өте төмен. Бізден келіп ем алғаннан азаматтарды біз квота бөліп, Павлодардағы оңалту орталығына жібереміз, - дейді  нарколог - дәрігері Қорлан Елеуова.

Венера Мирлан.